“Багануур” ХК-ийн “Эдийн засаг нийгмийн хөгжлийн сан”-ийн журам анх 2015.03.13-ны өдрийн Төлөөлөн Удирдах Зөвлөлийн №06 тоот тогтоолоор батлагдсан. Энэхүү журам энэ жил буюу 2024.10.28-ны өдрийн Төлөөлөн Удирдах Зөвлөлийн №29 тоот тогтоолоор шинэчлэгдэн батлагдсан.

Эдийн засаг нийгмийн хөгжлийн сангийн эх үүсвэр нь дараах байдлаар бүрддэг. Үүнд:

– Компанийн үндсэн үйл ажиллагааны давуулан биелүүлсэн орлогын 3 хүртэл хувь хэмжээгээр

– Хоёрдогч түүхий эдийн борлуулалтын орлогын 50 хүртэл хувь

– Түрээсийн орлогын 30 хүртэл хувь

– Шинэ санал санаачлагаас орсон үр ашгийн орлогын 40 хүртэл хувь

Эдийн засаг нийгмийн хөгжлийн сангийн хөрөнгийг дараах зориулалт, хувь хэмжээгээр хуваарилдаг. Үүнд:

– Ажилтнуудын нийгмийн асуудлыг шийдвэрлэхэд 50 хувь

– Компанийн хүний нөөцийн хөгжилд дэмжлэг үзүүлэхэд 15 хувь

– Буцалтгүй тэтгэмж, тусламжид 10 хувь

– Шагнал урамшуулалд 20 хувь

– Шинэ бүтээл, оновчтой санал, инновацыг дэмжихэд 5 хувь зарцуулахаар заасан байдаг.

“Багануур” ХК-ийн Төлөөлөн Удирдах Зөвлөл 2024 онд нийт 23 удаа хуралдаж, 31 тогтоол шийдвэр гаргаж ажилласны дотор энэхүү “Эдийн засаг нийгмийн хөгжлийн сан”-ийн журам шинэчлэгдэн батлагдсан юм.

2024 оны батлагдсан төлөвлөгөөгөөр компанийн хүний нөөцийн бодлогыг хэрэгжүүлэх, өрсөлдөх чадвартай шилдэг мэргэжилтэн бэлтгэх зорилгоор компаниас баталсан “Компанид шаардлагатай тэргүүлэх мэргэжил”-ээр дотоодын өмчийн бүх хэлбэрийн их дээд сургууль болон нарийн мэргэжлээр коллеж, МСҮТөвд суралцаж байгаа “Багануур” ХК-ийн ажилтны хүүхэд, Багануур дүүргийн харьяат оюутанд сургалтын тэтгэлэг олгохоор шийдвэрлэлээ.