Багануур ХК-ийн нийт ажилтнуудын 2024 оны сүүлийн хагас жилийн зөвлөгөөн өнөөдөр /2024.12.05/ боллоо. Бүгдээрээ хэлэлцвэл буруугүй, бүлээн усаар угаавал хиргүй гэдэгчлэн Монгол улсын эрчим хүчний тулгуур уурхай Багануур ХК-ийн уурхайчин хамт олон 2022 оноос хойш жилд хоёр удаа хавар намрын улиралд зөвлөгөөн зохион байгуулж, тухайн цаг хугацаанд компанийн захиргаа болон ажилтнууд хийж хэрэгжүүлсэн ажлаа ярьж, алдаа оноогоо дүгнэж, цаашдын ажлаа хамтдаа төлөвлөдөг уламжлалтай болсон. 6 дахь удаагаа зохион байгуулж буй зөвлөгөөнд өнөөдөр хэсэг бүрийн төлөөлөл 400 орчим ажилтан оролцов.

Өнгөрөгч 2023 оны намрын зөвлөгөөнд компанийн 9 хэсэг, 3 албаны удирдлагууд хэсгийнхээ үйл ажиллагаа хийгээд ажилтнуудадаа тулгамдаж буй асуудлыг танилцуулан хэлэлцүүлсэн. 2023 оны намрын зөвлөгөөнөөр ажилтнуудаас нийт 45 санал хүсэлт ирүүлсний 28 нь биелсэн бол 15 нь үйлдвэрлэлийн үйл ажиллагааны төлөвлөгөөнд орсон, 2 нь биелэх шатандаа явж байна.

2024 оны хаврын зөвлөгөөнд Монгол Улсын Шадар сайд, УИХ-ын гишүүн С.Амарсайхан, Эрдэнэс Монгол Нэгдлийн Гүйцэтгэх захирал С.Наранцогт нар ирж оролцсон. Монгол Улсын Шадар сайд, УИХ-ын гишүүн, тухайн үеийн “Эрчим хүчний үнэ тарифыг судалж, зохицуулах” ажлын хэсгийн ахлагч С.Амарсайхан уурхайгаасаа эхлээд эрчим хүчний салбарын үнийг нэмэх, улмаар чөлөөлөх асуудал ерөнхийдөө тодорхой болсон хэмээж байсан нь биеллээ олж эрчим хүчний реформын хүрээнд үнэ тарифыг тодорхой хувь хэмжээгээр нэмээд байна. Мөн өдөр Эрдэнэс Монгол нэгдлийн гүйцэтгэх захирал С.Наранцогт 2024-2025 оны өвлийн бэлтгэлийг хангахад шаардлагатай санхүүгийн асуудлыг Засгийн газрын хуралдаанаар оруулан хэлэлцүүлж, Эрдэнэс Монгол нэгдлийн зүгээс шийдвэрлэх болсныг мэдэгдэж байсан нь тэр даруйдаа ажил хэрэг болсон. Үүний үр дүнд 2024-2025 оны өвлийн бэлтгэл ажлын төлөвлөгөө 96 хувийн биелэлттэй байна. Улмаар Багануур ХК 2024 онд 4.734 мян.тн нүүрс олборлон борлуулах төлөвлөгөөтэй байсан хэдий ч эрчим хүчний өсөн нэмэгдэж буй хэрэгцээнээс шалтгаалан цахилгаан дулааны станцуудын нэмэлт захиалгын дагуу 110 мян.тн нүүрс нэмж олборлох болж, Төлөөлөн Удирдах Зөвлөлөөр тодотгол батлуулан ажиллаж байна.

Өнөөдрийн зөвлөгөөнийг нээж Гүйцэтгэх захирлын үүрэг гүйцэтгэгч Д.Түвшинжаргал хэлсэн үгэндээ “2024 оны намрын зөвлөгөөнөө цаг хугацааны хувьд оройтуулан зохион байгууллаа. Бид энэ онд олборлож буй нүүрснийхээ үнийг нэмэгдүүлж, өртөгт нь хүргэх чиглэлээр шат дараалалтай арга хэмжээ авч ажиллалаа. Эрчим хүчний үнэ тариф нэмэгдээд 20 хонож байгаа хэдий ч эрчим хүчний гол эх үүсвэр болох нүүрсний үнэ нэмэгдэх шийдвэр өнөөдрийг хүртэл гараагүй байна. Монгол улсын эрчим хүчний хэрэгцээт нүүрсний 50 гаруй хувийг дангаараа хангаж буй уурхай, уурхайдаа тулгамдаж буй асуудал, Монгол улсаа гал алдуулахгүйн тулд жилийн 365 хоногт 24 цагаар тасралтгүй ажиллаж, ачааны хүндийг үүрч яваа уурхайчид та бүхнийхээ нийгмийн асуудлыг шийдвэрлэх хэмжээний шийдвэр гарахыг төр засгаасаа хүлээсээр өнөөдрийг хүрлээ. Хэдийгээр нүүрсний үнэ нэмэгдүүлэх шийдвэр гараагүй байгаа ч бидэнд зогсох эрх байхгүй тул 2024-2025 оны өвлийн оргил ачааллыг хэрхэн даван туулах, 2025 онд ямар зорилго, зорилттой ажиллахаа хамтдаа шийдвэрлэцгээе” хэмээсэн юм. Мөн тэрээр хэлсэн үгэндээ Эрдэнэс Монгол нэгдлийн удирдах ажилтны зөвлөгөөнийг компани дээрээ амжилттай зохион байгуулсан, Mining week уул уурхайн 7 хоног арга хэмжээнд амжилттай оролцсон зэрэг хаврын зөвлөгөөнөөс хойш зохион байгуулсан ажлуудаа дурдсан юм.

Үүний дараа компанийн хэлтсүүдийн дарга нар тус тусынхаа чиглэлийн дагуу хийсэн ажил, хэрэгжүүлсэн төсөл хөтөлбөрүүдээ танилцууллаа.

Тухайлбал:

– Хөдөлмөрийн аюулгүй байдал, Эрүүл ахуйн хэлтэс хөдөлмөрийн эрүүл мэндийн хяналт, хөдөлмөрийн эрүүл ахуйн хяналт, ХЭМАБ-ын ISO 45001:2018 стандартын хэрэгжилтийн талаар;

– Худалдаа хангамж хариуцсан хэлтэс үр ашигтай худалдан авалтыг хуулийн хүрээнд зохион байгуулж буй тухай болоод цаашид худалдан авалтын төлөвлөлтийг хэрхэн сайжруулах талаар;

– Санхүү эдийн засгийн бодлогын хэлтэс нийгмийн даатгалын шимтгэл төлөлт, дүүргийн татварт сар бүр 700,0-800,0 сая төгрөгийг төлж, орон нутгийн татварын үлдэгдэл төлбөрийг бууруулан ажиллаж байгаа тухайгаа болоод Эрдэнэс Монгол нэгдлийн аудит, Төрийн аудитын өгсөн зөвлөмжийг хэрэгжүүлэн ажиллаж буй талаар;

– Технологийн бодлогын хэлтэс 2024 оны уулын ажлын төлөвлөгөөний гүйцэтгэл, дунд хугацааны ТЭЗҮ, хайрганы ТЭЗҮ боловсруулсан талаар;

– Техникийн бодлогын хэлтэс компанийн уул тээврийн болон цахилгаан эрчим хүч, дулаан ус хангамжийн инженерийн шугам сүлжээ, үндсэн болон туслах тоног төхөөрөмжүүдийн ашиглалт засвар, техник үйлчилгээний чанарын талаар;

– Судалгаа хөгжлийн хэлтэс Нүүрс бутлан ачих байгууламж №03 шинээр барих, Нүүрс химийн үйлдвэр байгуулах, “Төмөр динозавр” түүх соёл, аялал жуулчлалын цогцолбор байгуулах зэрэг төслүүдээ танилцууллаа.

Харин Захиргаа хүний нөөц, удирдлагын хэлтсийн танилцуулсан хүний нөөцийн оролт гаралтын асуудалд компанийн удирдлагууд анхаарч, мэргэжилтэй ажилтнуудынхаа тогтвор суурьшилтай ажиллах нөхцөлийг бүрдүүлэх чиглэлээр дорвитой арга хэмжээ авах тухай хэлэлцлээ. Хүний нөөцийн оролт гаралтын тухайд өнгөрсөн 2023 онд 77 ажилтан ажлаас чөлөөлөгдсөний 46 нь өөрийн хүсэлтээр гарсан бол 2024 онд 111 ажилтан ажлаас чөлөөлөгдсөний 31 нь өөрийн хүсэлтээр чөлөөлөгдсөн байна. Энэ нь яах аргагүй компанийн үйлдвэрлэж байгаа бүтээгдэхүүний үнэ, өртгөөсөө бага байгаагаас улбаалсан цалин хөлс нийгмийн асуудалтай холбоотой юм.

Хэлтсүүдийн танилцуулгын дараа ажилтнууд асуулт асууж санал хүсэлтээ илэрхийллээ. Ажилтнуудын асуусан асуултын дийлэнх нь нүүрсний үнийн нэмэгдэл, цалин хөлсний нэмэгдэлтэй холбоотой хариулт эрсэн асуудлууд байв. Харин ажилтнуудаас гарч буй саналын олонх нь компанийн ирээдүйн хөгжил, нэмэлт орлого олох боломжийн талаар байв.

Ийнхүү 2024 оны сүүлийн хагас жилд хийж амжуулсан ажил, амжилт ололт, 2025 оны зорилго зорилт, төлөвлөгөөгөө хэлэлцсэн зөв төлөвлөлтөөс, сайн гүйцэтгэл сэдэвт зөвлөгөөн өндөрлөлөө.

Улсын эдийн засгийн хөгжлийн гол тулах цэг, тусгаар тогтнол аюулгүй байдлын баталгаа болсон эрчим хүчний салбарт үүссэн хомсдол, гажуудлыг бага ч болов өөрчилж реформ хийж үнэ тарифыг тодорхой хувь хэмжээгээр нэмэгдүүлсэн. Харин одоо эрчим хүч, дулааны гол эх үүсвэр болох нүүрсний үнийг нэмэгдүүлэх ажлыг Эрчим хүчний зохицуулах хороо цаг алдалгүй зохион байгуулж, нүүрсний үнийг өртөгт нь хүргэх шийдвэр гаргана гэж уурхай, уурхайчид нь хүлээсээр байна.